موضوع: اللي زهقت من وقفة المطبخ تتفضل هنا الخميس أبريل 21, 2011 2:06 pm
اللي زهقت من وقفة المطبخ تتفضل هنا.... السلام عليكم ورحمة الله وبركاته أزيكم كلكم يا رب تكونوا بخير إنهارده فكرت إزاي ممكن نقلل شوية من وقفة المطبخ اللي مينفعش نهرب منها كل يوم فطار وغدا وعشا ده غير طلبات العيال وباباهم بين الوجبات ففكرت ازاي ممكن نرتاح شويةوده بعض الافكار واللي عندها حاجة جديدة يا ريت تضيفها عشان كلنا نستفاد: 1-بالنسبة للسندوتشات للي عندها ولاد في المدرسة ممكن تعمليها قبل نا تنامي وتغلفيها كويس وحتى ممكن تعملي لجوزك سندوتشات بدل الفطار وممكن تسلقي البيض من بالليل برده والصبح يا دوب تعملي الشاي لجوزك واللبن للاولاد وكل واحد ياخد اكله ويمشي بالسلامة وهتلاقي ان مفيش حاجة في الحوض غير كام كوباية عشان انتي هتسيبي المطبخ نظيف بالليل. 2-ولو هتنامي شوية بعد ما كلهم ينزلوا هتصحي تفطري عادي وتغسلي اللي في الحوض وتوضبي الشقة عادي وتشوفي شغل البيت ونبتدي في الغدا اليوم اللي هتعملي فيه مثلا مكرونة بالباشميل تعملي كمان صينية كوسة بالباشميل وتحطيها في الفريزر وتسويها لما تحتاجيها ولو زاد منك شوية باشاميل ممكن تعملي شوربة كريمة تقدميها جنب الاكل وتسلقي فراخ او لحمة بعدد افراد الاسرة وتحطيهم في الثلاجة ويكونوا جاهزين على التحمير بس كل ده وانتي لسه في المطبخ وبالمرة تغسلي خضار السلطة وبكده هتكوني حضرتي غدا يومين او تلاتة خلصتي من المواعين وهيكون عندك بس الاطباق وصينية واحدة تغسليها. 3-اليوم اللي هتعملي فية كفتة اعملي كمية تكفي كذا يوم وحطيها في الفريزر واليوم اللي هتعمليها طلعيها الصبح وهتكون فكت من التلج على ما يجي معاد الغدا و جنبها مكرونة بالصلصة وسلطة.
4-اليوم اللي هتعملي فية فراخ بانية اغسلي الفراخ وتبليها وكمان تبلي البفتيك وحطيه في الفريزر لحد ما تحتاجية وبكده برده المواعين هتكون اقل . 5-لما تحمري لسان العصفور او الشعرية حمري كمي كتير وحطيهم في علبة في التلاجة وكمان لما تعملي صلصة زودي الكمية وحطي في الفريزر وبجد هتسهلك كتير وطبعا التوم المفروم والبصل بيتحطوا في الفريزر وبيوفروا وقت . 6- حتى اصناف الحلويات اعملي كمية يعني لو اولادك بيحبوا الجيلي او الكريم كراميل اعملي كمية تكفي يومين او اكتر وحطي في التلاجة والكيكة اعمليها وبعد ما تبرد حطيها في علبة في التلاجة عشان ما تنشفش وبردة هتنفع يومين تلاتة لحد ما الولاد يخلصوها بالهنا والشفا. 7-بالنسبة مثلا للعشا العيش يكون متقطع اربع والفينو تكوني فاتحاة قبل ما تحطيه في الفريزر ولما تحتاجيه حطيه في الفرن دقايق وبيكون طازة. 8-يوم الجمعة بقى كل الناس بتكون اجازة الا الزوجة شغل مستمرانا بعمل اية ساعات بعمل البيتزا وبحطها في الفريزر وبطلعها تفك واسويها وبتبقى حلوة اوي وممكن اليوم ده ناكل تونة او سندوتشات كفتة وبطاطس محمرة وبكون عاملة كمية سلطة كول سلو وحاطاها في التلاجة في علبة وبيكون اليوم سهل وخصوصا اني يوم الخميس بنضف وغسل والمع عشان مش بحب اشتغل كتير يوم الجمعة. ويا رب اكون افدتكم واللي بتعمل اي حاجة بتسهلها يا ريت تقولنا عشان نستفيد